Türkiyədə fəaliyyət göstərən müğənni Doğuş TV proqramlarından birində qonaq olarkən ailəsi ilə bağlı maraqlı məqamlar gündəmə gəlib.

Milli.Az xəbər verir ki, veriliş zamanı həyat yoldaşı, jurnalist Xoşqədəm Hidayətqızı oğulları Arda və Arınla birlikdə canlı bağlantı vasitəsilə efirə qoşulub. Ailə üzvlərinin səmimi söhbəti izləyicilərin marağına səbəb olub.

Xoşqədəm Hidayətqızı övladlarının təhsilinə böyük önəm verdiyini vurğulayaraq, onların gələcəkdə cəmiyyətə faydalı insanlar kimi yetişməsini arzuladığını bildirib. O, valideyn kimi bəzən tələbkar davrandığını, lakin bunun uşaqların gələcəyi naminə olduğunu qeyd edib.

Canlı yayım zamanı Arda və Arın da aparıcıların suallarını cavablandırıblar. Uşaqlar ataları ilə birlikdə futbol oynadıqlarını, müxtəlif fəaliyyətlərlə məşğul olduqlarını və birlikdə keyfiyyətli vaxt keçirdiklərini söyləyiblər. Arda hətta atasını "dünyanın ən yaxşı atası" adlandırıb.

Söhbət zamanı uşaqların gələcək planlarından da danışılıb. Onların idmana maraq göstərdiyi, eyni zamanda musiqi təhsili aldıqları və piano dərslərinə qatıldıqları bildirilib.

Verilişdə futbol mövzusu da diqqətdən kənarda qalmayıb. Arda sevdiyi komandanın Galatasaray olduğunu, Arın isə Fenerbahçe azarkeşi kimi çıxış etdiyini deyib. Doğuş isə uzun illərdir Traktor klubuna rəğbət bəslədiyini açıqlayıb.

Ailə həyatı ilə bağlı sualları cavablandıran Xoşqədəm Hidayətqızı həyat yoldaşının romantik xarakterindən də bəhs edib. Onun sözlərinə görə, Doğuş tez-tez sürprizlər edir və mənəvi dəyəri yüksək olan jestlərlə ailəsini sevindirməyi sevir.

Səmimi anların yaşandığı proqram sosial şəbəkələrdə də maraqla qarşılanıb və izləyicilər tərəfindən geniş müzakirə olunub.

Musa
Milli.Az