Uzun müddətdir efirlərdən uzaq qalan keçmiş aparıcı, hazırda bloqer kimi fəaliyyət göstərən Nərmin Əlisoy (Nara) sosial şəbəkədə açdığı canlı yayım zamanı səsləndirdiyi fikirlərlə diqqət çəkib.

Milli.Az xəbər verir ki, aparıcı şəxsi həyatı ilə bağlı danışaraq bildirib ki, beş ildir ailəlidir və bu müddət ərzində həyat yoldaşının telefonunu bir dəfə də olsun yoxlamayıb.

"5 ildir ailəliyəm, ərimin telefonuna bir dəfə də baxmamışam. Mən özümə o qədər hörmətsizlik edib alçala bilmərəm ki, belə bir addım atım", - deyə o vurğulayıb.

Nərmin Əlisoy xəyanət mövzusuna da toxunaraq bildirib ki, əgər münasibəti davam etdirmək qərarı veriləcəksə, xəyanəti üzə vurmağın heç bir faydası yoxdur. Onun sözlərinə görə, belə hallarda sonrakı münasibətlər əvvəlki kimi olmur və zaman keçdikcə vəziyyət adiləşə bilər.

Aparıcı, həmçinin boşanma qərarının emosional deyil, düşünülmüş şəkildə verilməsinin vacibliyini qeyd edib. O bildirib ki, qadın belə bir addım atmazdan əvvəl gələcək həyatını, övladını və arxasında dayanacaq ailə dəstəyinin olub-olmadığını da nəzərə almalıdır.

Nərmin Əlisoyun bu açıqlamaları sosial şəbəkələrdə fərqli reaksiyalar doğurub. İzləyicilərin bir qismi onun fikirlərini dəstəkləyib, digərləri isə bu yanaşma ilə razılaşmadıqlarını ifadə ediblər.

Müəllif: Tural Hüseyn (Milli.Az redaktor)