“Oskar-2026” mükafatının namizədləri ənənəvi olaraq birgə foto çəkdiriblər — mükafat mövsümünün ən yadda qalan ənənələrindən biri mərasim ərəfəsində yenə davam etdirilib. Bu il “Oskar” mərasimi 15 mart tarixində keçiriləcək.

OLAY yazır ki, şəkil 10 fevralda Los-Ancelesdə baş tutan illik namizədlər üçün təşkil olunan nahardan sonra çəkilib. Bu tədbir əsas kino mükafatına iddialı olanları bir araya toplayır və faktiki olaraq “Oskar” yarışının final mərhələsinin başlanğıcı hesab olunur.

Ümumi “class photo” uzun illərdir davam edən ənənədir. Bütün namizədlər sıralar üzrə düzülür və birlikdə foto çəkdirirlər — beləliklə, kino sənayesinin həmin ilin “portreti” yaradılır.

Namizədlər üçün təşkil olunan nahar 1980-ci illərdən keçirilir və mərasim öncəsi ilk böyük rəsmi tədbir sayılır.

Qərb mediasının məlumatına görə, bu il görüşə 24 kateqoriya üzrə demək olar ki, 230 namizəd qatılıb. Tədbir təkcə bayram ab-havası ilə deyil, həm də sənayeyə yeni daxil olanlarla tanınmış ulduzların tanışlıq platforması kimi diqqət çəkib.

Qrup fotosunda Timoti Şalame, Emma Stoun, Keyt Hadson, Maykl B. Cordan və bir çox digər məşhurlar yer alıb. Bəzi aktyorlar üçün bu, ilk “Oskar” şansı olsa da, Leonardo Di Kaprio və Şon Penn artıq altıncı dəfə aktyor nominasiyası qazanıblar.